Héðinsfjarðará

Héðinsfjarðará hefur löngum verið ákaflega vinsæl bleikjuveiðiá enda hafa oft verið sagðar sögur af stútfullri ánni af bleikju. Áður en Héðinsfjarðargöng voru byggð var ekki hlaupið að því að komast í ána. Var þá ýmist farið á bátum frá Siglufirði eða gengið yfir Hólsskarð sem er um þriggja tíma ganga. Bleikjan byrjar að ganga seinnipartinn í júní upp í Héðinsfjarðarvatn, en í júlí er svo mesta gangan í sjálfa ána. Þetta er allvæn bleikja og getur hæglega farið í allt að 5 pund. Fyrir þennan tíma getur verið góð veiði í fjörunni fyrir framan Héðinsfjarðarvatnið sjálft.