Þeir Blöndubræður, Árni Baldursson og Reynir Sigmundsson lönduðu tveimur löxum í morgun í Blöndu. Þetta telst til tíðinda því að opnanir síðustu tvö ár hafa ekki skilað laxi.
Reynir landaði 92 sentímetra hrygnu í morgun á Breiðu suður. Þegar langt var liðið á vaktina fór Árni Baldursson upp í veiðihús og pakkaði saman farangri til að geta ekið beint í bæinn. „Þegar ég kom aftur að Blöndu var enginn á Breiðunni að norðanverðu. Klukkan var hálf eitt og ég hljóp niður stigann. Sá allt í einu að það var kominn hettumávur á ánna. Fyrst tveir og svo voru þeir allt í einu orðnir sex. Ég tengi alltaf saman fugla og fiska. Ég óð út í með German Snælduna mína. Þetta hefur verið svona í fimmta kasti. Þá tók hann með látum,“ greindi Árni frá aðspurður um hvernig þetta hefði viljað til.
Mikil gleði. Árni Baldursson fékk þessa 86 sentímetra hrygnu í lok vaktarinnar. Það komu tveir laxar í opnun Blöndu en síðustu tvö ár hefur ekki veiðst lax í opnunarhollinu. Ljósmynd/Reynir Sigmundsson
mbl.is – Veiði · Lesa meira