Opnunardagur upp á tíu í Þveránni

Tíu lax­ar voru færðir til bók­ar í Þverá á opn­un­ar­degi í dag. Eins og við greind­um frá í dag skilaði fyrri vakt­in sex löx­um og sett var í fjóra til viðbót­ar. Eft­ir há­degi náðist einn lax í Brenn­unni sem er hluti af opn­un­ar­svæðinu. Glæsi­leg tveggja ára hrygna veidd­ist í Kirkju­streng. Var það mál manna sem að viður­eign­inni komu að fisk­ur­inn hefði verið þessi klass­íski stór­lax að vori. „Fisk­ar í heimsklassa,“ missti einn út úr sér. Hrygn­an var grá­lúsug og viðbúið er að lax sé far­inn að ganga í stækk­andi straum sem nær há­marki sínu á fimmt­dag.

Fisk­ar sem sáust Klapparfljóti voru að öll­um lík­ind­um komn­ir upp í Hólmatagl. Þar sást ekki fisk­ur í morg­un en í fyrsta kasti eft­ir há­degi nelgdi 85 sentí­metra hæng­ur flugu veiðimanns­ins.

Styrkár Jökull Davíðsson með gerðarlegan grálúsugan lax sem hann fékk í Kirkjustreng í dag. Samtals komu tíu laxar á land í Þverá þennan opnunardag. Ljósmynd/DM

mbl.is – Veiði · Lesa meira