Formlegri opnun í Þverá í Borgarfirði lauk í hádeginu. Veitt var á átta stangir í tvo og hálfan dag og skilaði það 26 löxum á land. „Þetta er besta opnun frá því árið 2016,“ upplýsti Ingólfur Ásgeirsson leigutaki Þverár í samtali við Sporðaköst.
Sjö laxar veiddust í morgun og er það mat Ingólfs að laxinn sé í hraðri göngu enda skilyrði eins góð og þau geta orðið. „Hann er lagstur í Kirkjustreng og á nokkra aðra hefðbundna staði en annars er hann í göngu.“ Nefndi Ingólfur sem dæmi að hann hefði sjálfur skotist í Arnarstreng sem er á svæði sjö og fengið þar 70 sentímetra smálax. Dæmigerður göngustaður. Klapparfljótið gerði vel við Ingólf og gömlu meistarana Aðalstein Pétursson og Andrés Eyjólfsson en þeir lönduðu þremur þar í morgun. Allt fiskar ríflega 80 sentímetrar. Samanlagður starfsaldur þeirra Alla og Andrésar við Þverá telur fjölmarga áratugi.
Meistaradeildin. Aðalsteinn Pétursson með allt í keng og Andrés Eyjólfsson klár með háfinn. Þeir lönduðu þremur í Klapparfljótinu í morgun. Ljósmynd/Ingólfur Ásgeirsson
mbl.is – Veiði · Lesa meira