Fréttir af snemmgengnum löxum halda áfram að berast. Varla var búið að setja niður laxateljarann í Langá þegar 72 sentímetra hrygna skaust í gegn. Þykkur og fallegur vorlax. Árnefnd í Sandá í Þistilfirði er að störfum og fullyrða nefndarmenn að lax sé mættur þar.
Sigurður Már Einarsson fiskifræðingur og helsti sérfræðingur þjóðarinnar í laxfiskum á Vesturlandi sagði, „Vorið er svo yndislegur tími og maður veðrast allur upp þegar þeir fyrstu mæta,“ þegar hann var spurður um laxinn sem gekk upp Skuggafoss og sjá má á myndbandinu sem fylgir fréttinni. Sigurður var ekki viss um hvort þetta væri það fyrsta sem hann myndi eftir þegar kemur að laxi í Langá. „Þetta er allavega óvenju snemmt og ég man ekki eftir staðfestum fiski fyrr. Hér spilar náttúrulega inn í gott vor og mikil hlýindi þannig að árnar og líka sjórinn hafa verið með hlýrra móti og það skiptir máli.“
Sigurður segir að sjávarhiti núna sé hærri en oft hefur verið og vísar hann þar til þess mikla sólfars sem verið hefur í maí. Það hafi líka áhrif á sjóinn. „Svo er það þekkt að laxinn fer frekar í hindranir þegar vatnshiti er orðinn sex til sjö gráður. Göngutími í allar ár á Íslandi hefur verið að færast framar undanfarin ár og sennilega má rekja það til hlýnunar.“
Fossbrotið efsti veiðistaður í Sandá, sem hægt er að veiða af einhverju viti. Þegar hann liggur á og við brotið er það oftar en ekki tökufiskur. Ljósmynd/Ólafur Finnbogason
mbl.is – Veiði · Lesa meira