Reyðarvatn

Reyðarvatn er í Borgarfjarðarsýslu, upp frá botni Lundarreykjadals. Það er 8,3 km² að flatarmáli og hæð yfir sjávarmáli er 325 m. Ekið er að vatninu frá Uxahryggjarvegi. Í vatnið austanvert kemur Reyðarlækur úr Stóra-Brunnvatni. Frá norðaustri falla í það tvær ár, Leirá og Fossá. Hin þekkta laxveiðiá, Grímsá fellur úr vatninu til norðvesturs. Í Reyðarvatni er allmikið af bleikju og murtu. Veiðst hafa yfir 12 punda fiskar, en algengasta stærð er 1-2 pund og er þá murtan ekki talin með. Margir góðir veiðistaðir eru allt í kringum vatnið. Einn besti veiðistaðurinn er þar sem Grímsá rennur úr vatninu og annar þar sem Fossá rennur í vatnið.