Þríhyrningsvatn

Þríhyrningsvatn er allfjarri byggðu bóli, vestan við Þríhyrningsfjallgarð í Jökuldalshreppi. Það er 4,3 km² að flatarmáli, dýpst 33 m og er í 585 m hæð yfir sjó. Í vatninu er mikið af bleikju og er hún að mestu leyti frekar smá. Þó eru þar til stórfiskar líka, sennilega ránbleikjur. Bleikjan var þó almennt stór og feit á meðan netaveiði var stunduð af kappi. Suður frá vatninu rennur Þríhyrningsá, sem síðar heitir Arnardalsá, til Jökulsár á Fjöllum. Akfært er að vatninu eftir ýmsum leiðum og best er að fá leiðbeiningar frá kunnugum. Vatnið er að mestu í landi Brúar á Jökuldal en tilheyrir þó að hluta Möðrudal á Fjöllum.