Hraunsvatn

Hraunsvatn liggur vestan við Selvatn og Reyðartjörn á Skagaheiði, er um 0.70  km² að flatarmáli og liggur í um 190 m yfir sjávarmáli. Vatnið er sagt að stærstum hluta í Skagafjarðarsýslu en Austur-Húnvetningar telja þó að hluti þess sé í þeirra sýslu. Þokkaleg sátt hefur náðst um þá skoðun. Þetta er eitt þeirra vatna á heiðinni sem var ofsetið af smáfiski á sínum tíma. Var þá ráðist í umfangsmiklar veiðar í net, með Bjarna á Hvalnesi í broddi fylkingar. Nú er þokkaleg bleikja í Hraunsvatni en hún er talin veiðast illa á stöng. Menn gætu þó lagt leið sína upp að vatninu og sannreynt þá kenningu. Aðkoman er að vísu eftir afar slæmum jeppaslóða frá Selvatni.