Stæðavötn og Vaðall

Stæðavötn eru tvö fjallavötn uppi á Hafnarfjalli fyrir ofan Breiðuvík. Þangað er u.þ.b. 10 mínútna gangur frá veginum að Ferðaþjónustunni í Breiðuvík, þar sem veiðileyfi eru seld og gisting í boði. Efra-Stæðavatn er u.þ.b. 1 km langt og 800 m breitt og hið neðra 700 m langt og 500 m breitt. Ekki er vitað um nákvæma dýpt vatnanna, en giskað á 4-8 m. Í vötnunum er urriði sem er 0,5-4 pund. Hann hefur vakið undrun manna fyrir að vera silfurgljáandi, líkt og hann væri sjógenginn. Hefur þetta vakið upp spurningar um hvort í vötnunum sé ísaldarurriði líkt og í Þingvallarvatni. Veiðimönnum er vísað á bestu veiðistaðina. Einnig geta menn reynt fyrir sér í svokölluðum Vaðli sem er niður við sjó hjá Breiðuvík en þar er einnig urriði.